वीरगंज, २४ जेठ । नक्कली प्रहरी बनेर सर्वसाधारणलाई ठगी गर्ने एकजना ‘नटवरलाल’ मोतिहारी प्रहरीको फन्दामा परेका छन।
मोतिहारी जिल्लाको सुगौली थाना क्षेत्रमा गोप्य सूचनाको आधारमा प्रहरीले त्वरित कारबाही गर्दै सम्भावित लुटको घटना समयमै विफल पारेको हो।
सुगौली थानाध्यक्ष अनीश कुमार सिंहको नेतृत्वमा गएको प्रहरी टोलीले भटहां गाउँँमा छापा मारेर नितेश कुमार नामक आरोपीलाई पक्राउ गरेको हो। प्रहरीका अनुसार पक्राउ परेका नितेशले आफूलाई प्रहरी अधिकारीको भेषमा प्रस्तुत गरी मानिसहरूलाई डर देखाउने र ठगी गर्ने गर्दथे।
छापामारीको क्रममा उसको घरबाट २ स्टार लागेको प्रहरी वर्दी, टोपी, चक्कु र टर्च बरामद गरिएको छ। बरामद सामग्रीले उसको आपराधिक गतिविधि पुष्टि भएको प्रहरीको भनाइ छ। प्रारम्भिक सोधपुछमा नितेशले आफ्ना अन्य साथीहरूको वारेमा पनि खुलाएका छन। उसको बयानका आधारमा थप २ जना संदिग्धको नाम पनि सार्वजनिक भएको छ।
यस घटनामा प्रहरीले ३ जनालाई नाम किटेर र ३ जनालाई अज्ञात राखेर मुद्दा दर्ता गरेको छ। फरार रहेका आरोपीलाई पक्राउ गर्न प्रहरीले खोजी तीव्र पारेको छ।
प्रहरीले दिएको जानकारी अनुसार नितेशको आपराधिक इतिहास पनि रहेको छ। ऊ यसअघि पटना भएको ३५ लाख रुपियाँँ ठगीको घटनामा समेत संलग्न रहेको अनुसन्धानमा खुलेको छ। यसबाट ऊ संगठित रूपमा अपराध गर्ने गिरोहको सदस्य रहेको देखिन्छ।
आवश्यक कानुनी प्रक्रिया पूरा गरेपछि नितेशलाई न्यायिक हिरासतमा मोतिहारी पठाइएको छ। मोतिहारीका एसपी स्वर्ण प्रभातले घटनाको गहन अनुसन्धान भइरहेको र फरार आरोपीलाई चाँडै पक्राउ गरिने बताए।
प्रहरीले सर्वसाधारणलाई कुनै पनि व्यक्ति प्रहरीको नाम लिएर डर देखाएमा तुरून्त नजिकको प्रहरी कार्यालयमा खबर गर्न आग्रह गरेको छ।
