अभिलाष गुप्ता
वीरगंज, २० साउन । जिल्ला प्रहरी कार्यालय पर्सामा कार्यरत प्रहरी नायब उपरीक्षक (डीएसपी) राजु कार्कीले पर्सा जिल्लाको शान्ति–सुरक्षा कायम गर्न, कानुनको प्रभावकारी कार्यान्वयन गर्न तथा नागरिकको सुरक्षालाई प्राथमिकतामा राख्दै निर्वाह गरिरहेको भूमिकाप्रति स्थानीय तहमा सकारात्मक प्रतिक्रिया व्यक्त हुने गरेको छ।
सहज, सरल र जिम्मेवार कार्यशैलीका लागि परिचित डीएसपी कार्कीले आफ्नो जिम्मेवारी इमानदारी, निष्पक्षता र व्यावसायिक ढंगले निर्वाह गर्दै आएको भन्दै विभिन्न सामाजिक तथा धार्मिक कार्यक्रमहरूमा सुरक्षाको प्रभावकारी व्यवस्थापन गरेको स्थानीयको भनाइ छ।
विशेषगरी गहवा माई रथयात्रा, हनुमान जयन्तीलगायत हजारौं श्रद्धालु सहभागी हुने धार्मिक कार्यक्रमहरूलाई शान्तिपूर्ण र व्यवस्थित रूपमा सम्पन्न गराउन सुरक्षा व्यवस्थापनमा उनले खेलेको भूमिकाको प्रशंसा गरिएको छ। यस्ता संवेदनशील अवसरहरूमा प्रहरीले अपनाएको सुरक्षा सतर्कताले नागरिकमा विश्वास बढाएको स्थानीयहरू बताउँछन्।
स्थानीयवासी तथा विभिन्न सामाजिक क्षेत्रका व्यक्तिहरूले डीएसपी कार्कीले देखाएको समर्पण, निष्ठा, अनुशासन र निष्पक्ष सेवाको कदर गर्दै आगामी दिनहरूमा पनि यही प्रतिबद्धताका साथ जिम्मेवारी सफलतापूर्वक निर्वाह गर्ने विश्वास व्यक्त गरेका छन्।
यसैबीच, उत्कृष्ट कार्यसम्पादन, व्यावसायिक नेतृत्व र नागरिकमैत्री प्रहरी सेवाका लागि डीएसपी राजु कार्कीलाई जिल्ला प्रहरी कार्यालय पर्साबाट उचित सम्मान वा पुरस्कार प्रदान गर्नुपर्ने आवाज पनि केही सामाजिक अगुवा तथा स्थानीयवासीबाट उठ्न थालेको छ। यद्यपि, यस सम्बन्धमा जिल्ला प्रहरी कार्यालयले कुनै आधिकारिक निर्णय सार्वजनिक गरेको छैन।
