बारा, २१ साउन। बाराको आदर्श कोतवाल गाउँपालिका–७, कोतवाली बेल्वाका ६० वर्षीय गणेश महतो कोईरीको करेन्ट लागेर मृत्यु भएको छ।
प्रहरीका अनुसार आज बिहीबार बिहान करिब १०:४० बजे गणेश महतो कोईरीले बिजुलीको पोलमा बत्ती बाल्नका लागि हुक लगाउने क्रममा एउटा हुकको तार विद्युत् लाइनमा अल्झिएको थियो। सोही क्रममा अर्को तार उनको शरीरमा खस्दा अचानक करेन्ट लागेर उनी गम्भीर घाइते भएका थिए।
घाइते कोईरीलाई तत्काल उपचारका लागि प्रादेशिक अस्पताल कलैया लगिएको थियो। उपचारका क्रममा उनका भाइ चन्देरश्वर महतो कोईरी साथमा रहेका थिए।
घटनाको जानकारी प्राप्त हुनासाथ इलाका प्रहरी कार्यालय महेन्द्र जयनगरबाट प्रहरी सहायक निरीक्षक पुजई महराको नेतृत्वमा प्रहरी टोली घटनास्थलतर्फ खटिएको थियो।
प्रहरीका अनुसार दिउँसो करिब १२:०५ बजे प्रादेशिक अस्पताल कलैयामा चिकित्सकले ईसीजी (ECG) परीक्षणपछि गणेश महतो कोईरीलाई मृत घोषणा गरेका हुन्। हाल शव सोही अस्पतालमा राखिएको छ भने घटनाबारे प्रहरीले थप अनुसन्धान गरिरहेको जनाएको छ।
