वीरगंज, ०५ भदाै। वीरगंजमा किस्ताबन्दीमा विभिन्न सामग्री उपलब्ध गराउने भन्दै करिब तीन वर्षअघि सञ्चालनमा आएको ‘अभियान डिजिटल वर्ल्ड’ले सर्वसाधारणबाट करोडौँ रुपैयाँ संकलन गरी अपचलन गरेको आरोप लागेको छ। संस्थाका सञ्चालक तथा जिम्मेवार व्यक्तिहरू सम्पर्कविहीन बनेपछि सयौँ सेवाग्राही तथा बजार प्रतिनिधिहरू आफूहरू ठगीमा परेको दाबी गर्दै न्यायका लागि प्रशासनको ढोका ढकढक्याउन पुगेका छन्।
पीडित सदस्य तथा बजार प्रतिनिधिहरूका अनुसार संस्थाले करिब ८ हजार सदस्य बनाएर प्रत्येक सदस्यबाट ३१ हजार ७२५ रुपैयाँका दरले रकम संकलन गरेको थियो। रकम बुझाएपछि सोही मूल्य बराबरको सामग्री उपलब्ध गराउने प्रतिबद्धता जनाइए पनि अधिकांश सदस्यलाई करिब १० देखि १२ हजार रुपैयाँ बराबरको मात्र सामग्री उपलब्ध गराइएको उनीहरूको आरोप छ।
बजार प्रतिनिधिहरूका अनुसार तीन वर्ष बितिसक्दा पनि करिब १ हजार २ सय सदस्यले अझै सामग्री पाउन बाँकी रहेको दाबी गरिएको छ। सदस्यहरूले सबै किस्ता रकम बुझाइसके पनि संस्थाले प्रतिबद्धताअनुसार सामग्री उपलब्ध नगराएको उनीहरूको गुनासो छ।
पीडितहरूले संस्थाका सञ्चालक दिपेश बर्नवाल, सुशील सर्राफ र विष्णु काफ्लेसहित लेखापालका रूपमा कार्यरत दिपेश बर्नवालका छोरा योगेश बर्नवाल सम्पर्कविहीन रहेको आरोप लगाएका छन्।
बजार प्रतिनिधि झन् ठूलो मारमा
यस घटनामा बजार प्रतिनिधिहरू समेत ठूलो समस्यामा परेको पीडितहरूको भनाइ छ। संस्थामाथि विश्वास गरेर उनीहरूले घरघरमा पुगेर सर्वसाधारणलाई सदस्य बनाएका थिए। तर सदस्यहरूले सामग्री नपाएपछि आफूहरूमाथि नै दबाब, गालीगलौज र धम्की आउने गरेको उनीहरूको गुनासो छ।
बजार प्रतिनिधिहरूले आफूहरूले संकलन गरेको रकम संस्थामा बुझाए पनि त्यसको स्पष्ट हिसाब–किताब आफूहरूलाई उपलब्ध नगराइएको बताएका छन्। संस्थाको आर्थिक कारोबार पारदर्शी नभएको भन्दै उनीहरूले सम्पूर्ण वित्तीय विवरण सार्वजनिक गर्न माग गरेका छन्।
व्यक्तिगत खातामा रकम जम्मा गरेको आरोप
पीडितहरूले संस्थाको नाममा संकलन हुनुपर्ने रकम सञ्चालक दिपेश बर्नवाल र उनका छोरा तथा लेखापाल योगेश बर्नवालले नगद रूपमा लिएर व्यक्तिगत बैंक खातामा जम्मा गरी कम्पनीको रकम हिनामिना गरेको आरोप लगाएका छन्। आधिकारिक खातामार्फत कारोबार नगरी आर्थिक अनियमितता तथा कर छलीसमेत गरिएको उनीहरूको आरोप छ।
सोही रकम हिनामिना गरी सञ्चालकहरू सम्पर्कविहीन भएपछि समस्या उत्पन्न भएको एक अर्का शेयरधनी ऋषिकान्त गुप्ताले बताए।
यस विषयमा सम्बन्धित निकायले बैंक कारोबार, कम्पनीको लेखा तथा करसम्बन्धी विवरणसमेत छानबिन गर्नुपर्ने पीडितहरूको माग छ।
संस्थाले कति रकम संकलन गर्यो, कति रकमबाट सामग्री खरिद भयो, कति रकम वितरण भयो र बाँकी रकम कहाँ तथा कसरी खर्च भयो भन्ने विषयमा समेत गम्भीर प्रश्न उठेको छ।
प्रशासनमा सामूहिक उजुरी
पीडित सेवाग्राही तथा बजार प्रतिनिधिहरूले आफूहरूबाट संकलित रकम फिर्ता गराउन, संस्थाको आर्थिक कारोबार छानबिन गर्न तथा दोषी देखिएका व्यक्तिमाथि कानुनी कारबाही गर्न माग गर्दै जिल्ला प्रशासन कार्यालय, पर्सामा सामूहिक उजुरी दिएका छन्।
तर उजुरी दिएको महिना बितिसक्दा पनि ठोस निर्णय वा प्रभावकारी कारबाही अघि नबढेको पीडितहरूको गुनासो छ। उनीहरूले तत्काल छानबिन गरी संस्थाको वास्तविक आर्थिक अवस्था, पीडितको संख्या र क्षतिको यकिन विवरण सार्वजनिक गर्न माग गरेका छन्।
पीडितहरूले आफूहरूको मेहनतको कमाइ र वर्षौँदेखि जम्मा गरेको रकम जोखिममा परेको भन्दै रकम फिर्ता र दोषीमाथि कडा कानुनी कारबाही हुनुपर्ने माग गरेका छन्।
यस घटनाले सर्वसाधारणबाट ठूलो रकम संकलन गर्ने संस्थाहरूको वित्तीय पारदर्शिता, नियमनकारी निकायको निगरानी तथा उपभोक्ताको रकमको सुरक्षामाथि समेत गम्भीर प्रश्न खडा गरेको छ।
