रक्सौल, २४ असाेज । महालयाको पावन अवसर तथा शारदीय नवरात्रको शुभारम्भको अवसरमा शनिबार भारत विकास परिषद्, शाखा–रक्सौल, उत्तर बिहार प्रान्त (पूर्वी क्षेत्र) को आयोजनामा रक्सौलको प्रसिद्ध धार्मिक आस्थाको केन्द्र दक्षिणमुखी (राजदण्डी) हनुमान मन्दिर परिसरमा श्रद्धा, भक्ति र सेवाभावले भरिपूर्ण खीर प्रसाद वितरण कार्यक्रम सम्पन्न भयो।
दिउँसो २ बजेदेखि आयोजित कार्यक्रममा श्रद्धालुहरूका बीच खीर प्रसाद वितरण गरिएको थियो। धार्मिक आस्थासँगै सामाजिक सद्भाव, आत्मीयता र सेवाको सन्देश दिने यस कार्यक्रमले भारतीय संस्कृतिको त्यो मूल भावलाई उजागर गर्यो, जसमा नरसेवालाई नारायण सेवा मानेर समाजप्रतिको दायित्व निर्वाह गरिन्छ।
कार्यक्रमका क्रममा मन्दिरका मुख्य पुजारी पण्डित अजय उपाध्यायको सान्निध्यमा वैदिक मन्त्रोच्चारणका साथ विधिपूर्वक पूजाअर्चना गरियो र भगवान् श्रीहनुमानजीलाई खीरको भोग अर्पण गरियो। यस अवसरमा विश्वकल्याण, समस्त प्राणीको सुख–शान्ति तथा आपसी सद्भावको कामना गरिएको थियो। वैदिक परम्परा र भक्तिमय वातावरणमा सम्पन्न यस अनुष्ठानले श्रद्धालुहरूलाई आध्यात्मिक शान्ति र सेवाको महत्त्वबारे सन्देश दिएको थियो।
यस अवसरमा भारत विकास परिषद्, शाखा–रक्सौलका अध्यक्ष रजनीश प्रियदर्शीले मन्दिरका मुख्य पुजारी पण्डित अजय उपाध्यायलाई दोसल्ला ओढाएर तथा दुर्गा सप्तशती धार्मिक पुस्तक प्रदान गरी सम्मान गर्नुभयो। यो सम्मान भारतीय संस्कृति, आध्यात्मिक परम्परा र धार्मिक संस्थाप्रतिको आदर एवं कृतज्ञताको प्रतीक बनेको थियो।
परिषद्का अध्यक्ष रजनीश प्रियदर्शीले महालया र शारदीय नवरात्र केवल धार्मिक अनुष्ठानका अवसर मात्र नभई आत्मशुद्धि, शक्तिको आराधना, सद्भाव र मानव सेवाको संकल्पलाई बलियो बनाउने पवित्र पर्व भएको बताउनुभयो। भारत विकास परिषद्को उद्देश्य सेवा, संस्कार, सम्पर्क, सहयोग र समर्पणका माध्यमबाट समाजमा सकारात्मक चेतना फैलाउनु रहेको उहाँले बताउनुभयो।
धार्मिक आस्था त्यतिबेला मात्र सार्थक हुन्छ, जब त्यसमा आवश्यकतामा परेका व्यक्तिप्रतिको संवेदना, समाजप्रतिको जिम्मेवारी र सबैको कल्याणको भावना जोडिन्छ। खीर प्रसाद वितरणजस्ता कार्यक्रमले मानिसहरूलाई आपसमा जोड्नुका साथै भारतीय सांस्कृतिक मूल्यलाई सुदृढ बनाउने काम गर्छन्, उहाँले भन्नुभयो।
मन्दिरका मुख्य पुजारी पण्डित अजय उपाध्यायले भारत विकास परिषद्, शाखा–रक्सौलको यस पहलको खुलेर प्रशंसा गर्नुभयो। उहाँले महालया र शारदीय नवरात्र शक्तिको आराधना, धर्मप्रतिको आस्था र लोककल्याणको भावना जागृत गर्ने अवसर भएको बताउनुभयो। वैदिक परम्परामा सम्पूर्ण सृष्टिको कल्याण, सबै प्राणीको सुख र विश्वमा सद्भावको कामना गरिएको उल्लेख गर्दै उहाँले यस्ता कार्यक्रमले धार्मिक आस्थालाई सामाजिक सेवासँग जोड्ने तथा मानिसहरूको मनमा आपसी प्रेम, करुणा र सहयोगको भावना विकास गर्ने बताउनुभयो। उहाँले सबै श्रद्धालुको सुख, शान्ति र मंगलमय जीवनको कामना गर्नुभयो।
कार्यक्रमका संयोजक तथा परिषद्का सम्पर्क संयोजक उमेश सिकारियाले भारत विकास परिषद्का प्रत्येक कार्यक्रम समाजसँग आत्मीय सम्बन्ध स्थापित गर्ने र सेवाभावलाई व्यवहारमा उतार्ने प्रयास भएको बताउनुभयो। महालयाको पावन अवसरमा खीर प्रसाद वितरण गर्नुको उद्देश्य श्रद्धालुहरूसँग खुसी बाँड्नुका साथै भक्ति, सद्भाव र समर्पणका मूल्यलाई जनजनसम्म पुर्याउनु रहेको उहाँले बताउनुभयो। कार्यक्रम सफल बनाउन सहयोग गर्ने सबै सदस्यप्रति आभार व्यक्त गर्दै उहाँले सामूहिक सहभागिता र आपसी सहयोगबाट मात्रै सेवाका काम सफल र प्रभावकारी बन्ने धारणा राख्नुभयो।
कार्यक्रममा सहयोग गर्ने परिषद्का सेवाभावी तथा उदारमना सदस्य मनोज कुमार सिंह र शरद सर्राफले धार्मिक तथा सामाजिक कार्यक्रममा सहयोग गर्नु समाजप्रतिको आफ्नो दायित्व निर्वाह गर्ने माध्यम भएको बताउनुभयो। महालया र नवरात्रजस्ता पवित्र पर्वले मानिसहरूलाई सेवा, भक्ति र सद्भावको सूत्रमा बाँध्ने उहाँहरूको भनाइ थियो। यस्ता कार्यक्रमबाट समाजमा सकारात्मक सन्देश प्रवाह हुनुका साथै मानिसहरूलाई सामूहिक रूपमा जनकल्याणका कार्यमा सहभागी हुन प्रेरणा मिल्ने उहाँहरूले बताउनुभयो।
यसैगरी, भारत विकास परिषद्, शाखा–रक्सौलका सेवा संयोजक सह मिडिया प्रभारी बिमल कुमार सर्राफले यस कार्यक्रममार्फत परिषद्ले सेवा, संस्कार र सामाजिक समरसताप्रतिको आफ्नो प्रतिबद्धता पुनः व्यक्त गरेको बताउनुभयो। मन्दिर परिसरमा आयोजित खीर प्रसाद वितरणले धार्मिक श्रद्धासँगै मानवीय आत्मीयताको सन्देश दिएको उहाँले उल्लेख गर्नुभयो। भक्ति केवल पूजाअर्चनामा सीमित नभई सेवा, सहयोग र समस्त मानव समाजको कल्याण गर्ने भावनामा पनि अभिव्यक्त हुनुपर्ने उहाँको भनाइ थियो।
कार्यक्रममा उमेश सिकारिया, मनोज कुमार सिंह, नितेश कुमार सिंह, सुनील कुमार, बिमल कुमार सर्राफ, अजय कुमार, विजय कुमार साह, अरविन्द जायसवाल, शरद सर्राफ, नैना सर्राफ, बन्टी केशान, रवि केशान, बेबी गोपेश्वरी, मन्दीप कुमार, अमरेन्द्र कुमार, प्रणीत तथा प्रियांशलगायतले खीर प्रसाद वितरणमा उल्लेखनीय योगदान दिनुभएको थियो।
कार्यक्रमबारे जानकारी परिषद्का सम्पर्क संयोजक उमेश सिकारिया तथा सेवा संयोजक सह मिडिया प्रभारी बिमल कुमार सर्राफले दिनुभएको हो।
