भारत – नेपालका प्रतिनिधि, विभिन्न विभागका अधिकारी तथा स्थानीय विद्यालयका विद्यार्थीहरूको सहभागिताले समारोह उत्साहपूर्ण

रक्सौल, 15 Aug. साउन ३० । भारतीय भूमि पत्तन प्राधिकरणअन्तर्गत भूमि पत्तन रक्सौल परिसरमा शनिबार ८०औँ स्वतन्त्रता दिवस हर्षोल्लास तथा देशभक्तिपूर्ण वातावरणमा मनाइएको छ। समारोहका प्रमुख अतिथि भारतीय भूमि पत्तन प्राधिकरणका उपसचिव मधुकर पाण्डेले राष्ट्रिय झण्डा फहराएर कार्यक्रमको शुभारम्भ गर्नुभयो। उपस्थित सहभागीहरूले ‘वन्दे मातरम्’ तथा राष्ट्रगानका साथ राष्ट्रप्रति सम्मान र देशभक्तिको संकल्प व्यक्त गरे।

झण्डोत्तोलन पछि प्रमुख अतिथि मधुकर पाण्डेले स्वतन्त्रता दिवसको शुभकामना दिँदै क्षेत्रको विकास तथा भारत–नेपालबीचको व्यापारिक सम्बन्धलाई थप मजबुत बनाउन भूमि पत्तन रक्सौलको महत्वपूर्ण भूमिका रहेको बताउनुभयो।समारोहमा भारत–नेपाल मैत्री तथा सीमापार सद्भावको सुन्दर झलकसमेत देखिएको थियो। नेपाल आईसीपी वीरगञ्जका टर्मिनल प्रमुख गणेश घिमिरे आफ्ना सहकर्मीहरूसहित कार्यक्रममा सहभागी हुनुभएको थियो। नेपाल सशस्त्र प्रहरी बल (एपीएफ), आईसीपी वीरगञ्जका डीएसपीसहित रक्सौलका विभिन्न गैरसरकारी संस्थाका प्रतिनिधि तथा सञ्चारकर्मीहरूको पनि उपस्थिति रहेको थियो।

कार्यक्रममा भूमि पत्तन रक्सौलसँग सम्बन्धित भन्सार, अध्यागमन, प्लान्ट क्वारेन्टाइन, एसएसबी लगायत विभिन्न विभागका अधिकारी तथा कर्मचारीहरूको उत्साहपूर्ण सहभागिता रहेको थियो। कार्यक्रममा प्रभात कुमार जना, राहुल गुप्ता, श्याम बाबु सिंह, सुरेशचन्द्र वर्मा, अख्तर सैफी, नारायण कुमार, कुन्दन कुमार पाण्डेय, प्रदीप कुमार दास, सुरभि कुमारी, प्रिया रानी, कुमारी नीतु, लक्ष्मी कुमारी, श्वेता कुमारी, रिंकु कुमारी, प्रकाश कुमारी, शुभम कुमार र सन्तोष कुमारलगायतको सहभागिता रहेको थियो।त्यसैगरी भारत विकास परिषद्, रक्सौल शाखाका अध्यक्ष रजनीश प्रियदर्शी तथा सञ्चार प्रभारी विमल कुमार सर्राफ आफ्ना सहकर्मीहरूसहित कार्यक्रममा उपस्थित रहनुभएको थियो।

समारोहको विशेष आकर्षण आसपासका गाउँबाट आएका विद्यालयका विद्यार्थीहरूको सक्रिय सहभागिता रह्यो। विद्यार्थीहरूले उत्साहपूर्वक कार्यक्रममा सहभागिता जनाउँदै स्वतन्त्रता दिवसको उल्लासलाई थप बढाएका थिए।कार्यक्रमको अन्त्यमा भूमि पत्तन रक्सौलका पत्तन प्रशासक कुमार राजीव रञ्जनले धन्यवाद ज्ञापन गर्नुभयो। उहाँले प्रमुख अतिथि, नेपालबाट आएका अतिथि, सुरक्षा निकाय, विभिन्न विभागका अधिकारी, सञ्चारकर्मी, भारत विकास परिषद्का सदस्य तथा स्थानीय विद्यार्थीहरूप्रति आभार व्यक्त गर्नुभयो।

राष्ट्रभक्ति, आपसी सद्भाव तथा भारत–नेपाल मैत्रीको सन्देशसहित समारोह गरिमापूर्ण रूपमा सम्पन्न भएको थियो।