लखीसराय, ०७ असाेज । हिन्दी पखवाडाका अवसरमा भारतका विभिन्न स्थान तथा नेपाल, बंगलादेशलगायत देशबाट लखीसराय पुगेका पत्रकारहरूले जिल्लाका ऐतिहासिक तथा धार्मिक स्थलको अवलोकन गरेका छन्। पत्रकार टोलीलाई लखीसराय जिल्ला प्रशासनले स्वागत तथा सम्मान गरेको छ।
अन्तर्राष्ट्रिय पत्रकार संघका अध्यक्ष राजु लामा, बंगलादेशका पत्रकार मोहम्मद अब्दुल रहमान तथा मानवअधिकार पत्रकारिताका क्षेत्रमा चर्चित वरिष्ठ पत्रकार डा. शशि भूषण कुमारलगायत पत्रकारलाई जिल्ला पदाधिकारी शैलेन्द्र कुमारले कार्यालय कक्षमा पुष्पगुच्छा प्रदान गर्दै स्वागत गरेका थिए। पत्रकार टोलीको प्रतिनिधित्व वरिष्ठ पत्रकार डा. शशि भूषण कुमार र पुरातत्वविद् डा. अरुण कुमारले गरेका थिए।
अल इन्डिया जर्नलिस्ट युनियन (AIJU) का राष्ट्रिय अध्यक्ष रञ्जित सम्राटको नेतृत्वमा बंगलादेश, नेपाल, भुटानलगायत विभिन्न देशका पत्रकारहरूको प्रतिनिधिमण्डल लखीसराय पुगेको हो। टोलीले जिल्लाको प्रसिद्ध ऐतिहासिक तथा धार्मिक स्थल इन्द्रधनेश्वर महादेव अशोकधाम मन्दिरको भ्रमण गरेको थियो। सो क्रममा मन्दिर परिसरमा रहेका प्राचीन मूर्ति तथा ऐतिहासिक अवशेषबारे पुरातत्वविद् अरुण कुमार र उनको टोलीबाट विस्तृत जानकारी लिइएको थियो।
त्यसपछि पत्रकार टोलीले लाली पहाडीमा पुरातात्त्विक उत्खननका क्रममा फेला परेको महिला बौद्ध भिक्षुहरूको छात्रावासका अवशेषको समेत निरीक्षण गरेको थियो। टोलीले उक्त स्थलसँग सम्बन्धित ऐतिहासिक तथा पुरातात्त्विक तथ्यबारे जानकारी लिएको थियो।
पुरातत्वविद् अरुण कुमारका अनुसार लाली पहाडीमा ठूलो संख्यामा महिला बौद्ध भिक्षुहरूको छात्रावासका अवशेष फेला परेका छन्। उनका अनुसार बिहारमा हालसम्म भएका पुरातात्त्विक खोजमध्ये यो स्थल सबैभन्दा ठूलो छात्रावासमध्ये एक हो। भविष्यमा लाली पहाडीलाई महत्वपूर्ण पर्यटकीय गन्तव्यका रूपमा विकास गर्न सकिने उनको भनाइ छ।
प्रतिनिधिमण्डलमा बंगलादेशको ढाकाबाट आएका पत्रकार एमके सिद्दिकी, नेपालका वीरगञ्जबाट पत्रकार रुद्र सुविद, आलम अन्सारी, हाजीपुरका वरिष्ठ पत्रकार डा. शशि भूषण कुमारलगायत सहभागी थिए।
यस अवसरमा लखीसरायका उपविकास आयुक्त (डीडीसी) सुमित कुमारले देश–विदेशबाट आएका पत्रकार तथा लखीसरायका AIJU प्रतिनिधिहरूलाई अंगवस्त्र प्रदान गरी सम्मान गरेका थिए।
डीडीसी सुमित कुमारले जमालपुरमा आयोजित अन्तर्राष्ट्रिय पत्रकार महासम्मेलनले विश्व शान्ति र लोकतन्त्रको संरक्षणमा सञ्चारमाध्यमको भूमिकाबारे महत्वपूर्ण सन्देश दिएको बताए। विश्वका विभिन्न क्षेत्रमा आपसी वैमनस्य र तनावका कारण युद्धको अवस्था सिर्जना भइरहेका बेला पत्रकार महासम्मेलनमार्फत विश्व शान्तिको सन्देश प्रवाह गर्नु सकारात्मक पहल भएको उनले बताए।
कार्यक्रममा AIJU का राष्ट्रिय प्रधान महासचिव सुनील कुमार, जिल्ला प्रधान महासचिव अमलेश कुमार पाण्डेय, कोषाध्यक्ष जयप्रकाश, कार्यकारिणी सदस्य मनीष कुमार, हिमांशु कुमारलगायतको उपस्थिति रहेको थियो।
