‘सम्भावना’ रक्सौलको मञ्चमा देखियो भारत–नेपाल मैत्रीको रंग
रक्सौल, १९ असाेज । विश्व शिक्षक दिवसको पूर्वसन्ध्यामा आइतबार साहित्य, कला, समाज तथा संस्कृतिमा समर्पित ‘सम्भावना’ मञ्चको आयोजनामा सम्पन्न जिल्ला स्तरीय शिक्षक सम्मान समारोह–२०२६ मा भारत–नेपाल मैत्री, सेवा र संस्कारको अनौठो संगम देखिएको छ।
समारोहमा विशिष्ट अतिथिका रूपमा सहभागी लायन्स क्लब अफ वीरगञ्ज मेट्रो सिटीकी अध्यक्ष तथा सामाजिक कार्यकर्ता, ग्रीन सिटी वीरगञ्ज एवं मानव सेवा संस्थासँग आबद्ध लायन पिया सिंहले सांस्कृतिक कार्यक्रममा सहभागी विभिन्न विद्यालयका करिब ७० जना विद्यार्थीलाई शैक्षिक सामग्री तथा आकर्षक उपहार प्रदान गरी उनीहरूको उत्साहवर्धन गर्नुभयो।
पिया सिंहको यस पहलले समारोहमा उपस्थित शिक्षक, अभिभावक तथा अतिथिहरूको ध्यान आकर्षित गरेको थियो। उहाँले बालबालिकाको प्रतिभालाई प्रोत्साहन गर्नु समाजको सामूहिक जिम्मेवारी भएको बताउँदै सम्मान र प्रोत्साहनले विद्यार्थीमा आत्मविश्वास बढ्ने तथा आफ्नो प्रतिभालाई अझ निखार्न प्रेरणा मिल्ने बताउनुभयो।
समारोहको अर्को विशेष आकर्षण लायन्स क्लब अफ वीरगञ्जकी संयुक्त सचिव तथा सामाजिक कार्यकर्ता लायन प्रसिद्धि आनन्द सिंहको सांस्कृतिक प्रस्तुति रह्यो। कार्यक्रमको सुरुवातमा उहाँले सरस्वती वन्दना प्रस्तुत गर्दै माता शारदाको आह्वान गर्नुभयो। त्यसपछि भावपूर्ण नृत्य प्रस्तुतिमार्फत उहाँले उपस्थित दर्शकको मन जित्दै प्रशंसा र ताली बटुल्नुभयो।
यस अवसरमा ‘सम्भावना’ परिवारका तर्फबाट लायन पिया सिंह तथा लायन प्रसिद्धि आनन्द सिंहलाई पुष्पगुच्छा, अंगवस्त्र तथा प्रशंसापत्र प्रदान गरी सम्मान गरिएको थियो।
पिया सिंहले शिक्षकले केवल पढाउने काम मात्र नगरी पुस्ताको निर्माण गर्ने बताउनुभयो। उहाँले भन्नुभयो, “आज यस मञ्चमा उपस्थित भएर म स्वयं सम्मानित भएको महसुस गरिरहेकी छु। शिक्षक समाजका ती दीप हुन्, जसले आफू जलेर आगामी पुस्ताको जीवनमा ज्ञानको प्रकाश फैलाउँछन्। कुनै पनि राष्ट्रको वास्तविक शक्ति उसका बालबालिका र उनीहरूको संस्कारमा हुन्छ। यी संस्कारलाई आकार दिन शिक्षकको भूमिका सबैभन्दा महत्वपूर्ण हुन्छ।”
उहाँले भारत र नेपालबीचको सम्बन्ध सीमासम्म मात्र सीमित नभई संस्कृति, परम्परा, भाषा, भावना र आत्मीयतासँग जोडिएको बताउनुभयो। उहाँले भन्नुभयो, “सीमाले दुई देशलाई अलग गर्न सक्छ, तर हाम्रो सांस्कृतिक आत्मीयता र मानवीय सम्बन्धलाई अलग गर्न सक्दैन।”
बालबालिकाको प्रतिभालाई सम्मान गर्ने अवसर प्राप्त हुनु आफ्नो लागि सौभाग्य भएको बताउँदै उहाँले यी बालबालिका विद्यालयका विद्यार्थी मात्र नभई भारत–नेपालको भविष्यका सेतु भएको उल्लेख गर्नुभयो। उनीहरूको प्रतिभालाई प्रोत्साहन गर्दै सपनालाई पखेटा दिनु सबैको दायित्व भएको उहाँको भनाइ थियो।
पिया सिंहले ‘सम्भावना’ मञ्चको प्रयासको प्रशंसा गर्दै साहित्य, कला, शिक्षा र संस्कृतिलाई एकसाथ जोडेर समाजमा सकारात्मक वातावरण निर्माण गर्नु महत्वपूर्ण सामाजिक सेवा भएको बताउनुभयो। उहाँले शिक्षकहरूलाई बालबालिकालाई किताबी ज्ञानसँगै संस्कार, संवेदना, अनुशासन र राष्ट्रप्रेमको शिक्षा दिन आग्रह गर्नुभयो।
समारोहमा उपस्थित भारत विकास परिषद्, शाखा–रक्सौलका अध्यक्ष रजनीश प्रियदर्शी तथा सेवा संयोजक सह मिडिया प्रभारी एवं लायन्स इन्टरनेशनल डिस्ट्रिक्ट ३२२ई जोन ४१ का जोन चेयरपर्सन सह डिस्ट्रिक्ट चेयरपर्सन बिमल कुमार सर्राफले लायन पिया सिंह र लायन प्रसिद्धि आनन्द सिंहको उपस्थिति तथा पहलको प्रशंसा गर्नुभयो।
उहाँहरूले विद्यार्थीलाई सम्मान तथा उपहार प्रदान गरेर उत्साहवर्धन गर्नु र प्रसिद्धि आनन्द सिंहले सांस्कृतिक प्रस्तुति दिनु भारत–नेपालबीचको अटुट सांस्कृतिक सम्बन्ध, आत्मीयता तथा पारस्परिक सम्मानको प्रेरणादायी उदाहरण भएको बताउनुभयो।
उहाँहरूले सेवा, संस्कार, शिक्षा र संस्कृतिको यो संगम समारोहमा सहभागी शिक्षक, विद्यार्थी तथा नगरका गण्यमान्य नागरिकका लागि लामो समयसम्म स्मरणीय रहने विश्वास व्यक्त गर्नुभयो।
यससम्बन्धी जानकारी भारत विकास परिषद्का सेवा संयोजक सह मिडिया प्रभारी बिमल कुमार सर्राफले दिनुभएको हो।
