अभिलाष गुप्ता
वीरगंंज, १२ कार्तिक । हिन्दू स्वयंसेवक संघ नेपालको आयोजनामा सञ्चालित सातदिने आवासीय प्राथमिक शिक्षा वर्ग २०८३ को समापन कार्यक्रम वीरगञ्जमा भव्य रूपमा सम्पन्न भएको छ। सात दिनसम्म सञ्चालन भएको उक्त शिविरमा सहभागी स्वयंसेवकहरूले शारीरिक, मानसिक तथा बौद्धिक विकाससँग सम्बन्धित विभिन्न अभ्यास र तालिम हासिल गरेका थिए।
समापन समारोहका अवसरमा स्वयंसेवकहरूले तालिमका क्रममा सिकेका अनुशासन, शारीरिक अभ्यास तथा विभिन्न कौशलहरूको आकर्षक प्रदर्शन गरेका थिए। उनीहरूको अनुशासित प्रस्तुति र सामूहिक अभ्यासले कार्यक्रममा उपस्थित अतिथि तथा सहभागीहरूको ध्यान आकर्षित गरेको थियो।
कार्यक्रममा माननीय विभाग सञ्चालक अशोक बैद्य, माननीय जिल्ला सञ्चालक माधव राजपाल, नगर सञ्चालक प्रेम कुशवाहा, वीरगञ्ज भिस्वा गुम्बाका प्रतिनिधि तथा राष्ट्रिय सहकार्यवाह रञ्जित सराफलगायत विभिन्न विशिष्ट व्यक्तित्वहरूको उपस्थिति रहेको थियो।
सात दिनसम्म सञ्चालन भएको प्रशिक्षणले स्वयंसेवकहरूमा अनुशासन, सामूहिक भावना, शारीरिक क्षमता तथा बौद्धिक विकास अभिवृद्धि गर्न सहयोग पुगेको आयोजकले जनाएको छ। शिविरका क्रममा सहभागीहरूले विभिन्न अभ्यासमार्फत आफूले सिकेका सीप र ज्ञानलाई समापन समारोहमा प्रस्तुत गरेका थिए।
प्रशिक्षणका क्रममा सिकेका अभ्यासहरूको प्रदर्शन तथा झाँकी प्रस्तुतिपछि सहभागी स्वयंसेवकहरूले वीरगञ्ज महानगरपालिकाका विभिन्न मुख्य स्थानहरूमा भव्य र्याली निकालेका थिए। नगरका प्रमुख बजार तथा सडकहरू परिक्रमा गर्दै निकालिएको र्यालीले कार्यक्रमलाई थप आकर्षक बनाएको थियो। र्यालीपछि कार्यक्रमको औपचारिक समापन गरिएको थियो।
समापन समारोहलाई सम्बोधन गर्दै वक्ताहरूले पछिल्लो समय विभिन्न माध्यमबाट हिन्दू धर्म तथा संस्कृतिमाथि प्रहार भइरहेको भन्दै चिन्ता व्यक्त गरेका थिए। उनीहरूले हिन्दू धर्म, संस्कृति र परम्पराको संरक्षण तथा संवर्द्धनमा सबैले आ–आफ्नो क्षेत्रबाट भूमिका निर्वाह गर्नुपर्नेमा जोड दिएका थिए।
वक्ताहरूले नेपाल र हिन्दू धर्मको सम्मान गर्न सम्पूर्ण नेपालीलाई आग्रह गर्दै देशको धार्मिक तथा सांस्कृतिक पहिचानको संरक्षण आवश्यक रहेको धारणा राखेका थिए। साथै, उनीहरूले नेपाल पुनः हिन्दू राष्ट्र बन्ने विश्वाससमेत व्यक्त गरेका थिए।
सातदिने आवासीय प्राथमिक शिक्षा वर्गको समापनसँगै सहभागी स्वयंसेवकहरूले प्रशिक्षणका क्रममा सिकेका सीप, अनुशासन र सामूहिक अभ्यासलाई व्यवहारमा उतार्दै संगठनका गतिविधिमा सक्रिय भूमिका निर्वाह गर्ने अपेक्षा गरिएको छ।
