ग्याँसको कृत्रिम अभाव सिर्जना गर्नेलाई कारबाही गर्ने प्रजिअको चेतावनी

बारा । खाना पकाउने एलपी ग्याँसको बिक्री–वितरणलाई सहज र पारदर्शी बनाउन जिल्ला प्रशासन कार्यालयले बुधवार साँझ ९ बुँदे निर्देशनात्मक सूचना जारी गरेको छ। बजारमा ग्याँसको कृत्रिम अभाव भएको र व्यापारीले मनपरी गरेको भन्दै उपभोक्ताको गुनासो बढेपछि प्रशासनले सूचना जारी गरेको हो ।

प्रमुख जिल्ला अधिकारी धर्मेन्द्रकुमार मिश्रद्वारा जारी सूचनामा अनावश्यक मौज्दात राखेर कृतिम अभाव सिर्जना नगर्न, सरकारले तोकेको भन्दा बढी मूल्यमा ग्याँस विक्री नगर्न, ग्याँस वितरण प्रणाली पारदर्शी बनाउन, खाली सिलिन्डर लिएर मात्र भरिएको सिलिन्डर बिक्री गर्न अनुरोध गरिएको छ । मिश्रले जिल्लाका सबै ग्याँस उत्पादक, वितरक र डिलरले तोकिएको नियम अनिवार्य रूपमा पालना गर्न, ग्याँस बिक्री र मौज्दातको अभिलेख कार्यालयमा पठाउन समेत निर्देशन गरेका छन् ।

प्रजिअ मिश्रले बजार अनुगमनलाई तीव्र बनाउने र नियम पालना नगरेको वा कालोबाजारी गरेको पाइएमा कानुन अनुसार कडा कारबाही गर्ने चेतावनी दिएका छन् । उनले ग्याँसको कालोबाजारी वा कृत्रिम अभाववारे जानकारी दिन उपभोक्ताले सहायक प्रमुख जिल्ला अधिकारीलाई सोझै ९८५५०४५४०३ मा फोन गर्न वा ह्वाट्सएप नम्बर ९८५५००७७७८ मा सन्देश पठाउन अनुरोध गरेका छन् ।