वीरगंज, ०४ असाेज । भोटेकोशी नदीमा आएको बाढीमा परी वीरगञ्ज महानगरपालिका क्षेत्रका करिब १५ जना बेपत्ता भएका छन्। बेपत्ता हुनेमध्ये वीरगंज महानगरपालिका–२२ जगरनाथपुरस्थित एउटै टोलका मात्रै ६ जना किशोर तथा युवा रहेका छन्।
बेपत्ता भएका व्यक्तिका परिवारको अवस्था बुझ्न वीरगंज महानगरपालिकाका प्रमुख राजेशमान सिंह र पूर्वमन्त्री प्रदीप यादवले परिवारजनसँग भेटघाट गरेका छन्। भेटका क्रममा परिवारजनले आफ्ना सन्तान तथा आफन्तको अवस्थाबारे अनिश्चितताका कारण भोग्नुपरेको पीडा र कठिनाइबारे जानकारी गराएका थिए।
महानगर प्रमुख सिंहले दुःखको यस घडीमा वीरगञ्ज महानगरपालिका बेपत्ता परिवारको साथमा रहेको बताउँदै बाढीमा परी बेपत्ता भएका वीरगञ्जका सबै परिवारलाई महानगरपालिकाको तर्फबाट आवश्यक सहयोग उपलब्ध गराउने प्रतिबद्धता जनाएका छन्।
उनले बेपत्ता व्यक्तिहरूको खोजी तथा पहिचानका लागि सम्बन्धित निकायसँग आवश्यक समन्वय गर्दै निरन्तर पहल गर्ने बताए।
जगरनाथपुरका ६ परिवारसहित भोटेकोशी बाढीमा परी बेपत्ता भएका सबैका परिवारप्रति महानगरपालिकाले ऐक्यबद्धता जनाउँदै आवश्यक सहयोग र समन्वयमा सक्रिय रहने जनाएको छ।
