रक्सौल, पूर्वी चम्पारण २३ असाेज । मानिसको जीवनमा जन्म र मृत्यु दुई यस्ता सत्य हुन्, जसमा उसको कुनै नियन्त्रण हुँदैन। तर यी दुईबीच प्राप्त हुने जीवन कसरी बिताउने भन्ने कुरा धेरै हदसम्म हाम्रा विचार, निर्णय र कर्ममा निर्भर हुन्छ। बितिसकेको हिजोलाई बदल्न सम्भव छैन र आउने भोलिको पनि पूर्ण निश्चितता हुँदैन। त्यसैले जीवनको वास्तविक सुन्दरता वर्तमानलाई बुझ्नु, स्वीकार गर्नु र त्यसलाई अझ राम्रो बनाउनुमा निहित छ।
आजको दिनलाई आनन्दपूर्वक बिताउनु नै जीवन जिउने साँचो कला हो। बितेका दिनका गल्तीबाट सिकौँ, आउने भोलिका लागि असल कर्म गरौँ र आजलाई चिन्तामा खेर फाल्नुको सट्टा सकारात्मक सोचका साथ बिताऔँ।
जीवनमा कतिपय समस्याहरू समयसँगै आफैँ समाधान हुँदै जान्छन्। तर कहिलेकाहीँ हाम्रो हतार, नकारात्मक सोच र अनावश्यक प्रतिक्रियाले सानो समस्यालाई पनि ठूलो बनाइदिन्छ। चिन्ताले शरीरको ऊर्जा कमजोर बनाउँछ र बिस्तारै मनको शान्ति पनि खोस्दै जान्छ। त्यसैले हरेक परिस्थितिमा आत्तिनुको सट्टा धैर्य, विवेक र आत्मविश्वास कायम राख्नु आवश्यक छ।
हाम्रो भविष्य केवल इच्छाले होइन, आज गरिने कर्मले निर्माण हुन्छ। वर्तमानमा आफ्नो समय, विचार र कर्मको सही उपयोग गर्ने व्यक्तिले नै आफ्नो भोलिलाई राम्रो बनाउन सक्छ। सफलताको बाटो सधैँ सहज हुँदैन, तर सङ्घर्षबाट पछि नहट्ने व्यक्तिले एक दिन आफ्नो मेहनतबाट नयाँ पहिचान बनाउँछ। रातको अन्धकार पार गरेपछि नै सूर्यको उज्यालो देखिन्छ। त्यसैगरी कठिनाइहरूले पनि हामीलाई अनुभव, साहस र अगाडि बढ्ने शक्ति प्रदान गर्छन्।
हाम्रा शब्द पनि हाम्रो व्यक्तित्वका ऐना हुन्। शब्द बोल्न कुनै मूल्य नलागे पनि तिनको प्रभाव अमूल्य हुन सक्छ। उचित शब्दले निराश मनलाई सहारा दिन सक्छ भने कटु वचनले वर्षौँ पुराना सम्बन्धमा समेत दूरी बढाउन सक्छ। त्यसैले बोल्नुअघि हाम्रा शब्दले कसैको जीवनमा खुसी थप्छन् वा दुःख बढाउँछन् भन्ने कुरा सोच्नु आवश्यक छ।
असल विचार असल व्यक्तिको सङ्गत, उत्कृष्ट साहित्य, सकारात्मक वातावरण र आत्मचिन्तनबाट विकसित हुन्छन्। जब हाम्रो सोच बदलिन्छ, तब व्यवहार बदलिन्छ र व्यवहारमा आएको परिवर्तनले जीवनको दिशा पनि बदल्न थाल्छ। त्यसैगरी परमात्माप्रतिको सहज विश्वास र समर्पणले मनलाई हलुका बनाउँछ। जब मानिसले अहङ्कार त्यागेर बालकजस्तै सरल भावले ईश्वरसमक्ष आफूलाई समर्पित गर्छ, तब उसले आन्तरिक शान्ति, प्रेम र मार्गदर्शनको अनुभूति गर्छ।
जीवनमा शान्ति प्राप्त गर्न सम्पूर्ण संसार बदल्नु आवश्यक छैन। जसरी पूरै पृथ्वीमा गलैँचा बिछ्याउनुभन्दा आफ्ना खुट्टामा चप्पल लगाउनु सजिलो हुन्छ, त्यसैगरी अरूका कमजोरी औँल्याउनुभन्दा आफूमा सुधार ल्याउनु बढी सार्थक हुन्छ। हामी अरूका विचार र व्यवहारलाई सधैँ नियन्त्रण गर्न सक्दैनौँ, तर आफ्ना प्रतिक्रिया, बोली र आचरणलाई अवश्य राम्रो बनाउन सक्छौँ।
उक्त विचार लायन्स क्लब इन्टरनेसनल डिस्ट्रिक्ट ३२२ई, जोन ४१ का जोन चेयरपर्सन सह डिस्ट्रिक्ट चेयरपर्सन एवं भारत विकास परिषद्, रक्सौलका सेवा संयोजक सह मिडिया प्रभारी तथा सामाजिक कार्यकर्ता बिमल सर्राफले सञ्चारमाध्यमसँग साझा गर्नुभएको हो।
सम्बन्धको संसार पनि अनौठो छ। समयसँगै आत्मीयताको परिभाषा बदलिँदै गएको देखिन्छ। तैपनि मानिसको हृदयले आफ्ना प्रियजनबाट प्रेम, सम्मान र अपनत्वको अपेक्षा गरिरहन्छ। यस्तो अवस्थामा गुनासा र अपेक्षाको बोझले सम्बन्धलाई कमजोर बनाउनुको सट्टा विश्वास, संवेदना, संवाद र क्षमाका माध्यमबाट तिनलाई बलियो बनाउनुपर्छ।
वास्तवमा, हाम्रो वर्तमान नै जीवनको ऐना हो। बितेको हिजोको पश्चात्ताप र आउने भोलिको चिन्ता त्यागेर आजलाई प्रेम, विवेक, परिश्रम र सकारात्मक सोचका साथ जिउन सिक्यौँ भने जीवनका धेरै जटिलता सहज बन्न सक्छन्। किनकि सुखी जीवन परिस्थितिहरू पूर्ण रूपमा अनुकूल भएर होइन, प्रत्येक परिस्थितिमा सही दृष्टिकोण अपनाउन सकेर निर्माण हुन्छ।
