वीरगंज, १२ असाेज । वीरगंज महानगरपालिकाले मुख्य सडक विस्तारको कामसँगै विद्युत्का तार भूमिगत गर्न आवश्यक बजेट व्यवस्थापन गर्न माग गरेको छ।
महानगरपालिकाका प्रमुख राजेशमान सिंहले सडक विस्तारसँगै विद्युत्का पोल तथा तारको दीर्घकालीन व्यवस्थापन गर्नुपर्ने भन्दै भूमिगत विद्युत् प्रणाली निर्माणका लागि आवश्यक बजेटको व्यवस्था गर्न माग गरेका हुन्। यस सम्बन्धमा उनले सोमबार सडक डिभिजन कार्यालय, हेटौँडाका प्रमुख किरण कार्कीलाई आफ्नै कार्यकक्षमा पत्र बुझाएका छन्।
त्रिभुवन राजपथअन्तर्गत गण्डक–घण्टाघर–भन्सार सडकखण्ड विस्तारको काम अघि बढिरहेका बेला विद्युत्का पोल तथा तारलाई पुनः ओभरहेड प्रणालीमै राख्दा भविष्यमा सडक मर्मत, थप विस्तार, यातायात व्यवस्थापन तथा शहरी सौन्दर्यीकरणमा समस्या उत्पन्न हुन सक्ने महानगरको भनाइ छ।
सडक विस्तार सम्पन्न भएपछि पुनः विद्युत्का पोल र तार जडान गर्नुपर्ने अवस्था आएमा सडक संरचनामा समेत असर पर्न सक्ने भएकाले अहिले नै विद्युत् प्रणालीलाई भूमिगत बनाउनु उपयुक्त हुने महानगरले जनाएको छ।
यसअघि पनि महानगर प्रमुख सिंहले विद्युत् तार भूमिगत गर्न आवश्यक बजेट तत्काल विनियोजन गरिदिन ऊर्जा, जलस्रोत तथा सिँचाइ मन्त्रालयसँग माग गर्दै पत्राचार गरेका थिए।
महानगरपालिकाले सडक विस्तारसँगै विद्युत् प्रणालीलाई भूमिगत बनाउन सम्बन्धित सरकारी निकायबीच आवश्यक समन्वय तथा बजेट व्यवस्थापन गर्नुपर्नेमा जोड दिएको छ।
