अभिलाष गुप्ता
वीरगंज, १२ असोज । प्रेस सेन्टर नेपाल पर्सा शाखाको नियमित बैठक विभिन्न विषयमा छलफल गर्दै सम्पन्न भएको छ। पर्सा शाखाका अध्यक्ष शिवनाथ यादवको अध्यक्षतामा बसेको बैठकमा पछिल्लो समयको पत्रकारिता क्षेत्रको अवस्था, संगठनका गतिविधि तथा संगठनलाई थप प्रभावकारी र व्यवस्थित बनाउने विषयमा छलफल गरिएको हो।
बैठकमा वर्तमान परिवेशमा पत्रकारहरूले भोगिरहेका चुनौती, पत्रकारिताको व्यावसायिकता, जिम्मेवार पत्रकारिता तथा संगठनको भूमिकालगायतका विषयमा सहभागीहरूले आफ्ना धारणा राखेका थिए। साथै प्रेस सेन्टर नेपाल पर्सा शाखाका आगामी गतिविधि र संगठनलाई थप सक्रिय बनाउने विषयमा समेत छलफल भएको जनाइएको छ।
बैठकमा प्रेस सेन्टर नेपालका केन्द्रीय सदस्य सन्तोष पौडेल, मधेश प्रदेश अध्यक्ष निरज पिठाकोटे मगर, नेपाल पत्रकार महासंघ मधेश प्रदेशका सचिव दीपक गौतम, प्रेस सेन्टर नेपाल पर्सा शाखाका अध्यक्ष शिवनाथ यादव, पदाधिकारी तथा सदस्यहरूको सक्रिय सहभागिता रहेको थियो।
बैठकमा संगठनका गतिविधिलाई थप प्रभावकारी बनाउँदै पत्रकारहरूको पेशागत हित, हकहित तथा क्षमता अभिवृद्धिका लागि आवश्यक पहल गर्ने विषयमा समेत छलफल भएको प्रेस सेन्टर नेपाल पर्सा शाखाका सचिव अजित भुजेलले जानकारी दिए।
सचिव भुजेलका अनुसार बैठकले वर्तमान अवस्थामा पत्रकारिता क्षेत्र र संगठनका गतिविधिलाई थप व्यवस्थित गर्दै आगामी दिनमा आपसी समन्वय र सहकार्यका साथ अघि बढ्ने विषयमा समेत जोड दिएको छ।
