वीरगंज, १३ असाेज । लायन्स क्लब अफ वीरगंज क्यापिटल, लायन्स क्लब अफ वीरगंज प्रभु र लायन्स क्लब अफ वीरगंज परिवारले पर्साको ठोरीमा वृद्धवृद्धा तथा असहायका लागि निःशुल्क स्वास्थ्य शिविर तथा राहत कार्यक्रम आयोजना गरेका छन्।
मंगलबार ठोरी गाउँपालिकाको भगवाननगरस्थित वृद्ध तथा असहाय आश्रममा संयुक्त रूपमा आयोजित कार्यक्रममा आश्रममा रहेका वृद्धवृद्धा तथा असहायको स्वास्थ्य परीक्षण गर्नुका साथै आवश्यक औषधि वितरण गरिएको थियो।
लायन्स क्लब अफ वीरगञ्ज क्यापिटलकी अध्यक्ष लायन कविता खड्काका अनुसार शिविरमा १३ जनाको रक्तचाप तथा मधुमेह परीक्षण गरिएको थियो।
कार्यक्रममा ठोरी गाउँपालिकाकी उपाध्यक्ष गोकुलीकुमारी रेग्मीको विशेष सहभागिता थियो। उनले गाउँपालिकाले वृद्धवृद्धा तथा असहायका लागि विभिन्न योजना अघि बढाएको भए पनि कार्यान्वयनका क्रममा केही प्रक्रियागत अवरोध रहेको बताइन्।
कार्यक्रममा रिजन चेयरपर्सन लायन डा लक्ष्मी थापा, जोन चेयरपर्सन लायन नरोत्तम पाण्डे, लायन्स क्लब अफ वीरगंज प्रभुकी अध्यक्ष लायन सरिता रम्तेल, लायन्स क्लब अफ वीरगंज परिवारका अध्यक्ष लायन दिगम्बर थापा, लायन्स क्लब अफ वीरगंज क्यापिटलका सचिव लायन शिवनाथ यादव, लायन चन्दन सिंह तथा स्थानीय समाजसेवी लायन सन्तोष श्रेष्ठलगायतको सहभागिता थियो।
कार्यक्रममार्फत आश्रममा आश्रित वृद्धवृद्धा तथा असहायलाई स्वास्थ्य सेवा र आवश्यक औषधि उपलब्ध गराइएको आयोजकले जनाएको छ।
