रक्सौल, १० कार्तिक । भारत–नेपाल मैत्री पुलको नेपाल र भारत दुवैतर्फ ई–रिक्साहरू अवैध रूपमा तथा अव्यवस्थित ढङ्गले पार्किङ गरिँदा दुवै देशका नागरिकलाई आवतजावतमा समस्या भइरहेको छ। पुलको दुवैतर्फ बिहानदेखि साँझसम्म ई–रिक्सा पार्किङ गरिँदा सवारीसाधनको आवागमन प्रभावित हुनुका साथै जामको समस्या उत्पन्न हुने गरेको छ। यस समस्याको समाधानको माग गर्दै सरोकार मञ्चका सदस्यहरूले वीरगंज महानगरपालिकाका मेयर राजेशमान सिंहलाई ज्ञापनपत्र बुझाएका छन्। उनीहरूले आगामी चाडपर्वलाई ध्यानमा राख्दै ई–रिक्साको पार्किङ व्यवस्थित गर्न माग गरेका छन्।
ज्ञापनपत्रमा मैत्री पुलको दुवैतर्फ ई–रिक्साको अनियन्त्रित पार्किङका कारण भारत र नेपालबीच आवतजावत गर्ने नागरिकले दिनहुँ जामको समस्या झेल्नुपरेको उल्लेख गरिएको छ। पुलमा दुवैतर्फबाट सवारीसाधन आवतजावत गर्ने क्रममा ई–रिक्साहरू जथाभावी पार्किङ गरिँदा यातायात व्यवस्था प्रभावित हुने गरेको छ। यसबाट सर्वसाधारण यात्रुका साथै सीमावर्ती क्षेत्रका नागरिकले समेत सास्ती भोग्नुपरेको छ। मेयर सिंहले मागलाई तत्काल कार्यान्वयन गर्दै समस्याको स्थायी समाधान गर्ने आश्वासन दिएका छन्।
सरोकार मञ्चले आगामी दीपावली तथा छठ पर्वका अवसरमा रक्सौल बजारमा किनमेल गर्न भारत र नेपालका हजारौँ नागरिक आउने भएकाले सवारी जामको समस्या थप बढ्न सक्ने जनाएको छ। यस्तो अवस्थामा मैत्री पुलमा ई–रिक्साको अव्यवस्थित पार्किङका कारण दुवैतर्फका नागरिकलाई आवतजावतमा थप कठिनाइ हुन सक्ने भएकाले समयमै समस्या समाधान गर्न माग गरिएको छ।
ज्ञापनपत्रमार्फत मेयरसँग मैत्री पुलमा अवैध रूपमा ई–रिक्सा पार्किङ गर्न रोक लगाउन, ई–रिक्साका लागि व्यवस्थित पार्किङस्थल निर्धारण गर्न तथा पुलको दुवैतर्फ यातायात व्यवस्था सहज बनाउन आवश्यक कदम चाल्न आग्रह गरिएको छ। यसबाट भारत र नेपालबीच आवतजावत गर्ने नागरिकले जामको समस्याबाट राहत पाउने अपेक्षा गरिएको छ।
ज्ञापनपत्र बुझाउनेहरूमा सरोकार मञ्चका सचिव राजेश कुमार वर्मा तथा सदस्यहरू रञ्जन किशोर मिश्र र पिंकी कुमारी रहेका थिए।
